Lesson Study сабағы өтті

13 қараша күні "Ізденіс әлемі" шығармашылық тобының ұйымдастыруымен 6-сыныпта қазақ әдебиеті пәнінен Lesson Study аясында ашық сабақ өткізілді. Сабақты қазақ тілі мен әдебиеті пәнінің мұғалімі Ныгыманбекова Меруерт Маратовна жүргізді. Сабақтың тақырыбы: А. Құнанбайұлының "Мен жазбаймын өлеңді ермек үшін" өлеңі.

Сабақ «Гауһар тас» әдісі арқылы жағымды психологиялық ахуал құрудан басталып, оқушылар Абайдың нақыл сөздерімен бір-біріне ізгі тілектер жолдады. Өткен тақырыпты қайталауда «Эпицентр» әдісі қолданылып, оқушылардың есте сақтау, ойлау және сұрақ қою дағдылары дамытылды.

Қысқа мерзімді жоспар топ мүшелерімен бірлесе талданып, сабаққа тиімді әдіс-тәсілдер іріктелді. А, В, С деңгейіндегі оқушыларға тапсырмалар сараланып берілді. Жаңа тақырыпты меңгерту кезеңінде оқушылар Stoopwatch платформасы арқылы екі топқа бөлінді:

• Бірінші топ өлеңге сатылай кешенді талдау жасады;

• Екінші топ семантикалық карта бойынша жұмыс орындады.

Сабақ соңында Wordwall платформасында тест тапсырмалары арқылы білімдері қорытындыланды. Кері байланыс «Қоржын» әдісімен жүргізіліп, бағалау «Шаңырақ» тәсілі арқылы жүзеге асты.

Сабақ өз мақсатына жетіп, оқушылардың әдеби шығарманы талдау дағдылары мен шығармашылық қабілеттерін дамытуға ықпал етті.