«Өмірдің мәні» тақырыбында тренинг

Педагог-психолог Жаркеева Нуризат Далеловна 8–11 сынып оқушыларымен «Өмірдің мәні» тақырыбында өзін-өзі тануға бағытталған танымдық-тренингтік жұмыс жүргізді.

Тренингтің мақсаты – оқушылардың өмір туралы терең ойлануына, өздерінің жеке құндылықтарын анықтауына, болашақтағы армандары мен мамандық таңдауына саналы түрде қарауына ықпал ету, сондай-ақ позитивті өмірлік позиция қалыптастыру.

Сабақ «Мен кіммін?» атты өзін-өзі тану жаттығуымен басталып, оқушылар өз бейнесін, мінез ерекшеліктерін және өмірге деген көзқарастарын талдады.

Одан кейін «Өмір ағашы» жаттығуы орындалып, оқушылар өз болашағын, өмірлік мақсаттарын, тілек-армандарын ағаш бейнесі арқылы бейнелеп, белсенділік танытты.

«Ең қымбат...» жаттығуы оқушыларға ерекше әсер қалдырды. Олар өздері үшін ең маңызды құндылықты таңдау барысында қиналғандарын, бұл тапсырманың өмірге басқаша қарауға мүмкіндік бергенін атап өтті.

Сабақ «Бір сөйлем» рефлексиялық жаттығуымен аяқталып, әр оқушы тренингтен алған ой-түйінін бір сөйлеммен жеткізді.

Бұл тренинг оқушылардың өзін-өзі тану қабілеттерін дамытуға, өмірге деген саналы көзқарасын қалыптастыруға және жеке жауапкершілікті арттыруға ықпал етті.